• Los nuevos curtiumetraxes d´Ánxeles Muñiz Cachón, Tito Montero, David Rodríguez Muñiz y David P. Sañudo entren a formar parte del catálogu de curtios en distribución de Llaboral Cinemateca
• Los cuatro trabayos, trés del xéneru documental y ún de ficción, van ser inscritos en certames de relevancia nacional ya internacional
• Más de 90 trabayos conformen yá l´Archivu xeneral de curtiumetraxes asturianos

20/01/2021.- Los curtiumetraxes Moru d´Ángeles Muñiz Cachón, Los ladrillos de Tito Montero, Nyami Nyami de David Rodríguez Muñiz y La colcha y la madre de David P. Sañudo foron escoyíos pa formar parte del Catálogu de Curtiumetraxes de Llaboral Cinemateca, un programa de promoción que tien por oxetivu difundir y distribuyir la producción rexonal de curtios en certámenes cinematográficos de relevancia nacional ya internacional. A la última convocatoria del programa presentáronse un total de 12 curtiumetraxes.

El Comité de Selección tuvo formáu por Andrea Jaurrieta, directora, guionista y profesora d´Historia del Cine, Interpretación y Dirección en diverses escueles especializaes y universidaes de Madrid; Concha Barquero, cineasta y docente que compaxina la televisión cultural y divulgativa cola producción y realización de cine documental y la so collaboración col Festival de Málaga. Cine n´Español, y pol periodista cinematográficu Víctor Iriarte, responsable del programa selmanal de cine nel Centru Internacional de Cultura Contemporanea Tabakalera y programador del Festival Internacional de Cine de San Sebastián.

Los trés espertos valoraron la calidá artística y técnica de los trabayos presentaos, la orixinalidá y la potencialidá a la hora de ser escoyíos en festivales, amás de la representatividá de la cultura y el cine d´Asturies. A partir d´esti momentu, Llaboral Cinemateca va encargase de la inscripción y presentación de los curtios escoyíos nos festivales y eventos audiovisuales más destacaos, mesmo de la escena nacional como del ámbitu internacional.

Moru, d´Ánxeles Muñiz Cachón

Moru ye la vida de munches persones, ye la so infancia, el so pasáu. La xente quier que s´igüe´l so antiguu edificiu pa poder restaurar les sos propies alcordances.

La reconstrucción d´una ilesia n´una aldega asturiana, llevada a cabu polos sos propios vecinos, y el redescubrimientu d´unes pintures murales ocultes so la pintura, válen-y a Ánxeles Muñiz Cachón (Propiedad privada, Mama Adèle) pa realizar una semeya coral sobre´l tesón y la collaboración que nos lleva a pensar na recuperación de les alcordances del pasáu pa encarar la identidá del futuru.

Los ladrillos, de Tito Montero

Tito Montero (El pasado presente, Un fantasma recorre […]) robla esti ensayu filmáu onde s´entecrucen los pensamientos políticos y les alcordances familiares. Chicago y Mieres, lo colectivo y lo individual, conviven nuna suerte de invocación de la memoria, la dignidá y el vértigu.

Nel so primer viaxe a los Estaos Xuníos, Montero sigue los pasos d´Eduardo Galeano peles cais de Chicago pa trazar un percorríu posible hacia´l monumentu a los Mártires de Haymarket, símbolu de la llucha mundial polos derechos llaborales y orixe de la celebración añal, cada primeru de mayu, del Día Internacional de los Trabayadores. Les palabres del cineasta y la so historia obrera familiar entevérense coles del escritor uruguayu y les d´otros referentes lliterarios pa componer un trayectu personal y colectivu tanto pel espaciu como pel tiempu.

Nyami Nyami, de David Rodríguez Muñiz

Tres l´exitosu Beyond the glacier (2019), David Rodríguez Muñiz firma una obra nel filu de lo real, rodada nel confinamientu, onde se crucien les histories d´una familia qu´espera´l regresu d´unos marineros que naufragaron nel Mar del Norte, ente que un vieyu llobu de mar aguarda la oportunidá de volver entamar una nueva aventura nel mar.

La colcha y la madre, de David P. Sañudo

David Pérez Sañudo (Ane, Un coche cualquiera) firma´l so curtiumetraxe más maduru nel qu´esquiza les víes del melodrama. Xuna estructura de tensión n´espiral alredor d´una conversación ente una madre y xuna fía qu´encara dos momentos vitales tan cotidianos como trascendentes.

Xuna madre va visitar a la so fía, xusto cuando esta diba salir. La fía tien muncha priesa: aldericó col so home y como nun llegue a la so nueva esposición, la relación apeligra. Pero la madre trái-y un regalu. Y xuna mala noticia. Si-y da dos minutos, se la cuenta.

Base de datos xeneral de curtiumetraxes asturianos

Tantu los curtios escoyíos pa la so distribución en cada convocatoria como aquellos que nun lo fueron, un total de 95 trabayos conformen anguaño l´Archivu de curtiumetraxes asturianos que Llaboral Cinemateca pon a disposición de programadores, investigadores, profesionales y aficionaos, sirviendo asina d´escapate del talentu creativu asturianu y promoviendo el desenvolvimientu del sector audiovisual del Principáu. Los realizadores asturianos van poder rexistrase tol añu pa que los sos curtiumetraxes, cumplan o non los requisitos de cada convocatoria del programa, formen parte del Archivu xeneral de curtios.